Safarka Madaxweyne Xasan Sheekh Maxamuud ee gobollada dhexe waa inuu noqdaa socdaal lagu xoojinayo nabadda, wadahadalka iyo midnimada shacabka Soomaaliyeed. Wararka la daabacay 13 iyo 14 Agoosto 2026 waxay sheegayaan in madaxweynuhu ku wajahan yahay Dhuusamareeb, isla markaana uu booqan doono deegaanno kale oo Galmudug ka tirsan. Waxaa kale oo la filayaa inuu tababar u soo xiro cutubyo ka tirsan ciidamada Soomaaliya.
Booqashadan waxay ku soo beegmaysaa xilli ay jiraan khilaafyo siyaasadeed, muran dastuur iyo walaac ku saabsan xiriirka dowladda federaalka iyo qaar ka mid ah dowlad goboleedyada. Baarlamaanka Soomaaliya wuxuu bishii Maarso 2026 ansixiyey wax ka beddel dastuur oo dhaliyey dood ku saabsan muddada xilka madaxweynaha iyo habka doorashada.
Haddii uusan jirin dastuur ilaaliya xuquuqda muwaadin kasta, isla markaana qof walba u arko inuu si siman ugu shaqaynayo shacabka, ma jiri doonto dowlad Soomaaliyeed oo haysata kalsooni iyo sharciyad buuxda. Dastuurku waa inuu mideeyaa dadka. Waa inuusan noqon qalab ay koox siyaasadeed, maamul ama beel gaar ahi dano ku raadsato.
Dowladda uu hoggaamiyo Madaxweyne Xasan Sheekh waxaa saaran masuuliyad weyn. Safarka gobollada dhexe waa inuu dadka tusaa in dowladdu u timid dhegeysi, heshiisiin iyo adeeg bulsho. Ciidamo la geeyo deegaan keliya ma dhisayaan dowladnimo. Dowladnimadu waxay u baahan tahay caddaalad, isla xisaabtan, amni iyo heshiis siyaasadeed oo loo dhan yahay.
Muwaadin kasta waa inuu midnimada dalka ku arkaa xuquuq, amni iyo mustaqbal uu qayb ku leeyahay. Qofka jooga Dhuusamareeb, Gaalkacyo, Caabudwaaq, Boorame, Seeylac, Garbahaareey,Balanbal,Xarardheere,Feerfeer Mudug Hargeysa, Garoowe, Baydhaba, Guriceel, Kismaayo iyo Muqdisho waa inuu dareemaa in Soomaaliya ay tahay dalkiisa. Waa inuu helaa xuquuq la mid ah tan muwaadiniinta kale.
Hoggaanka federaalka iyo madaxda dowlad goboleedyadu waa inay ka fogaadaan tallaabo kasta oo sii kala fogeynaysa bulshada. Khilaafka siyaasadeed laguma xalliyo awood ciidan, hadallo kicinaya dareenka shacabka ama goโaanno hal dhinac ah. Waxaa lagu xalliyaa wadaxaajood furan, dastuur lagu heshiiyey iyo doorasho lagu kalsoon yahay.
Kala googoโa Soomaaliya wuxuu abuuraa xuduudo cusub, khilaaf joogto ah iyo bulshooyin isu arka cadow. Midnimadu se macnaheedu ma aha in awoodda lagu ururiyo Muqdisho. Waxay ka dhigan tahay dowlad federaal ah oo awoodda, kheyraadka iyo masuuliyadda si caddaalad leh ula wadaagta dowlad goboleedyada iyo shacabka.
Madaxweyne Xasan Sheekh waa inuu socdaalkan uga faaโiideystaa dib u heshiisiin dhab ah. Waa inuu la kulmaa madaxda deegaanka, siyaasiyiinta mucaaradka, odayaasha, haweenka, dhalinyarada iyo bulshada rayidka ah. Cod kasta waa muhiim. Qofna lagama reebi karo wada hadalka ku saabsan mustaqbalka Soomaaliya.
Soomaaliya waxay u baahan tahay dastuur uu muwaadin kasta isku arko. Waxay u baahan tahay dowlad u adeegta dhammaan dadka. Waxay u baahan tahay hoggaan fahamsan in midnimadu tahay furaha lagu ilaaliyo qarannimada, laguna joojiyo kala googoโa dalka. Safarka gobollada dhexe wuxuu noqon karaa bilow wanaagsan, haddii ujeeddadiisu tahay isu keenidda dadka, dejinta khilaafaadka iyo dhismaha kalsoonida.
๐๐ฟ. ๐๐ฏ๐ฑ๐ถ๐ธ๐ฎ๐๐ถ๐บ ๐๐น๐ถ, ๐ฃ๐ต๐,๐ ๐ฆ๐๐ฆ,๐ ๐๐ฆ( ๐๐ฆ๐๐ฃ)
