Muqdisho-Madaxweynaha Jamhuuriyadda Federaalka Soomaaliya, Mudane Xasan Sheekh Maxamuud, ayaa maanta kulan wadatashi ah la qaatay hoggaanka ururrada siyaasadeed ee si rasmi ah isu diiwaangeliyey, kuwaas oo door muhiim ah ku leh geeddi-socodka dimuqraadiyeynta dalka.
Kulankan ayaa diiradda lagu saaray dardar-gelinta hirgelinta doorashada hal qof iyo hal cod, iyadoo Madaxweynaha uu faahfaahin ka bixiyey dadaallada ay dowladihii kala dambeeyay ku bixiyeen muddo labaatan sano ah, si shacabka Soomaaliyeed ay u helaan fursad ay si toos ah codkooda ugu doortaan hoggaan matala rabitaankooda.
Madaxweyne Xasan Sheekh ayaa carrabka ku adkeeyey in dowladdu ka go’an tahay dhammaystirka hannaanka doorasho ee dimuqraadi ah, isagoo xusay in wadatashiyada qaran iyo la-tashiyada joogtada ah ee lala yeesho daneeyayaasha siyaasadeed ay yihiin tiirar muhiim u ah xaqiijinta doorasho xor iyo xalaal ah.
Dhankooda, hoggaanka ururrada siyaasadeed ayaa bogaadiyey juhdiga ay dowladda ku bixinayso dhismaha nidaam doorasho oo toos ah, waxayna soo jeediyeen in la xoojiyo wacyigelinta dadweynaha si loo abuuro faham guud iyo ka-qaybgal ballaaran oo ku saabsan doorashooyinka soo socda.
Kulankan ayaa qeyb ka ah dedaallada joogtada ah ee Madaxtooyada Qaranka ay ugu jirto dhismaha hannaan doorasho oo loo dhan yahay, isla markaana ku saleysan wadatashi iyo hufnaan siyaasad
