Qairo(Mudugpost).Dowladda Masar ayaa si kulul u cambaareysay weerarkii ismiidaaminta ahaa ee Axadii lagu qaaday Xerada Damaanyo ee Magaalada Muqdisho, kaasi oo ay ku dhinteen in ka badan 20 ruux, halka 15 kalana ay ku dhaawacmeen.
Wasaaradda arrimaha dibadda Masar ayaa soo saartay bayaan ay ku muujineyso sida ay u garab taagan tahay Soomaaliya, waxayna tacsi u dirtay qoysaska iyo shacabka Soomaaliyeed.
Weerarkan oo mas’uuliyadiisa ay sheegatay Al-shabaab ayaa waxaa lala beegsaday goob ay ku sugnaayeen dhallinyaro la qorayay oo sugayay inay iska diiwaan-geliyaan saldhigga ciidamada. Goob joogayaal ayaa sheegay in ninka weerarka geystay oo u muuqday nin dhalinyaro ah uu muddo kooban ku dhex milmay ciidamadii tababarka loo soo xiray ka hor inta uusan qarxin waxyaabaha qarxa.
Mid ka mid ah dadkii ka badbaaday qaraxa ayaa u sheegay warbaahinta gudaha, “Wuxuu u muuqday mid maqan, laakiin ma jirin cid fursad u heshay inay ka fal-celiso,” isaga oo sharraxaya qaska iyo burburka ka dhashay qaraxa.
Hadalka Masar ayaa ku nuux-nuux saday taageerada ay siinayaan hay’adaha qaranka Soomaaliyeed oo ay ka mid yihiin ciidamada ammaanka iyo kuwa milateriga, waxaana lagu muujiyay sida degdegga ah ee loo xoojinayo haykalka dawladnimo ee Soomaaliya si loola dagaallamo argagixisada, xagjirnimada, iyo sidii dib loogu soo celin lahaa maamul buuxa oo dhuleed.
Duqeyntan ayaa ku soo beegantay hal maalin un kadib markii Gobolka Hiiraan lagu dilay Korneyl C/raxmaan Xujaale oo ahaa Taliye Guuto, iyadoo todobaadyo ka hor uu Madaxweyne Xasan Sheekh Maxamuud ka badbaaday isku day dil oo Al-Shabaab ay la beegsadeen bishii March.
Leave a Reply